Mala Reputación festexa 25 años con un conciertu y esposición en Cangues d’Onís
En 1998 cuatro collacios de Cangues d’Onís xuntáronse pa crear un grupu de punk-rock nomáu Mala Reputación. D’entós pacá pasaron 25 años y esi mesmu grupu de cuatro collacios convirtióse nuna de les formaciones más veteranes y reconocíes a nivel estatal del rock fechu n’Asturies. El próximu 9 setiembre a les 23h van celebrar esti aniversariu con un conciertu gratuitu na plaza l’Ayuntamientu del so Conceyu. Nél anuncien que va haber “un repertoriu únicu”, con canciones de tolos sos discos. Amás, les cais de Cangues van acoyer dende esi día y hasta finales de mes una esposición alrodiu los 25 años de la banda, con 11 paneles que resumen en semeyes y testos munches de les sos vivencies, conciertos, canciones y discos. Esta amuesa ta organizada pola Asociación Cultural El Buxu y toles actividaes tienen el sofitu de Ayuntamientu de Cangues d’Onís.
Mala Reputación tienen 9 trabayos publicaos que destaquen pola so evolución y madurez; dende unos entamos más punk-rock, hasta facer anguaño un rock posáu, cuidáu y con muncha personalidá propia, que fai d’esti cuartetu una formación única dientro de la escena rockera asturiana y estatal. Anque canten mayoritariamente en castellanu, el grupu siempre amosó’l so compromisu cola llingua asturiana nes sos intervenciones públiques y en redes sociales. Dientro del so repertoriu n’asturianu destaquen himnos como “Sin Atadures”, “Raigaños” o “Fálame” y con ellos collaboraron músicos de la escena de música n’asturianu como Xune Elipe de Dixebra o Corquiéu.
Los tres componentes que lleven dende l’entamu de la formación -Daviz Rodríguez, Kiko Martínez, Juan Santamaría- son de Cangues d’Onís y son parte importante de la vida cultural y social d’esta villa, por eso yera obligatoriu que festexaren esti aniversariu ellí. Amás, son un arguyu pal propiu conceyu, qu’esti añu los escoyó a ellos como pregoneros de les fiestes de San Antoniu y nel que la formación fizo un emotivu discursu reivindicando la importancia de la música, de la mocedá y de la so vida nesa villa. El próximu 9 setiembre de xuru qu’esa emotividá va volver a tar bien presente col so aniversariu.
Fuente: Musicasturiana
