MISIVA anuncia la so despidida

Dempués de 15 años d’actividá, el grupu punk-rock Misiva anuncia que lo dexen. La banda moscona ta acabante d’asoleyar un comunicáu nel qu’esponen los motivos d’esta decisión, agradecen a toles persones que los acompañaron nesti tiempu, repasen dalgunos de los momentos más especiales del so camín y anuncien tres conciertos de despidida de los que, pel momentu, adelanten la fecha d’ún, el del 3 de mayu nel festival Vidiagu Rock. Esti ye’l comunicáu completu:

«Sabemos que munch@s nun vais entendelo y qu’igual va ser difícil d’aceutar, pero depués de tantu tiempu, depués de tantes batalles xuntos, tantos conciertos, tantes ilusiones y tantos momentos que van quedar pa siempre na nuesa memoria, creemos que ye’l momentu de poner puntu y final a MISIVA .  

Nun hai más motivos qu’el sentir que ye la hora de zarrar una etapa, de pesllar un ciclu y d’entamar otru nuevu tanto na música como na vida. Nun se pueden facer especulaciones porque los 4 que formamos esto querémonos y vamos seguir siendo collacios d’equí palantre cola mesma hermandá de siempre. Simplemente queremos pone-y el ramu a esta parte de la nuesa vida tan importante y vamos facer que la despidida de MISIVA seya dalgo que nin nosotros nin vosotres podáis escaecer. Queremos facelo cola dignidá que merez la banda y tolo que representó pa nós y pa la música n’asturianu.

Si nos dicen de la qu’entamábemos col punkrock n’asturianu que díbemos vivir les coses que vivimos nestos casi 15 años, pensaríamos que tomaran dalguna sustancia psicotrópica tocha. De verdá que nun podemos tar más agradecíos y anque corremos el riesgo d’escaecer della xente, vamos tentar de facer l’exerciciu d’agradecer a toles persones que fixeron que MISIVA llegara onde llegó.

Lo primero de too, a les nuestres families, les nuestres pareyes, los nuesos fíos, que son los que más “sufrieron” esta droga que pa nosotros foi y ye la música. Gracies infinites por too y por tanto. Depués a Mata y al so El Garaje Producciones pola confianza, el trabayu, el sofitu y l’amistá que nos xunió toos estos años. ¡Yes el quintu Misivu! A  tola xente que d’una manera u otra foi parte de l’equipu de Misiva (Nacho Runner, Dani Valdés, Fermo, Chusín), a tolos compañeros que nos ayudaron a sacar munchos bolos p’alantre y que tamién escribístis la historia de Misiva, empezando por Medo (fundador), pasando por Miki, Jaime (Los Ruidos). A tola xente que collaboró nes grabaciones de los discos y de los videos, faciendo un gran paréntesis a la Cardosa Style Crew qu’engordaron coros, ficieron d’extras, gaiteros, pandereteros, actores, etc. y n’especial a RUBONÓN, porque nun imaxinábemos que los diseños y la imaxe de MISIVA llegara a traspasar fronteres y a dexar clisada a tola xente que tuvo’l nuesu merch ente les manes. 

A Dani Sevillano y a Pablo Senator por facer de los discos de Misiva los pepinacos que fueron.

A les bandes hermanes, sobremanera DESAKATO y MALA REPUTACIÓN. Nunca podremos agradecevos los suficiente tolo que nos fixistis medrar. Y a toles demás bandes coles que compartimos cartelu, a les qu’almiramos y a toles que nos acompangaron a lo llargo d’estos 15 años. Sois los meyores. 

Tamién, a tolos medios que nos dieron cobertoria too esti tiempo faciendo especial alcordanza de Musicasturiana.com colos que vinimos trabayando nestos últimos años con Xicu a los mandos.

Y pa zarrar esta segunda parte de la MISIVA FINAL, nun queríamos terminar ensin agradecer a la parte más importante d’estos 15 años: VOSOTRES. Vosotres que vinistis a tolos conciertos, que sentistis los nuesos cantares, que vistis los videoclips, que nos dexastis comentarios, que nos acompangastis con tol ciñu… Nunca pensábemos que díbemos ser tan queríos y que díbemos llegar a tanta xente. Fuistis y sois el suañu de 4 músicos que nun imaxinaben llegar tan lloñe cuando entamaban esta MISIVA. GRACIES INFINITES.

Un proyeutu como MISIVA nun podíamos zarralo de cualesquier manera. Queríemos facelo con dignidá, con amor y dando-y el ciñu que merez con tolo que supunxo pa nós esti viaxe musical. Asina que vais tener la oportunidá de venos 3 veces más. La que podemos adelantavos de momento ye, como espublizó ayeri’l propiu festi, el Vidiagu Rock, el 3 de mayu pa zarrar la Misiva pel oriente y volver a ún de los llugares onde nos fiximos mayorinos nesto de la música. Va prestar formar parte na vuelta del festival.

Los otros dos, magar que ta casi too zarrao, nun podemos anunciávoslos tovía. Hai qu’esperar un pocoñín más. Serán otros dos sitios míticos ya especiales. Tai sollertes.

Con esto terminamos esta MISIVA FINAL. Tovía nos queden los escenarios. Tres últimes veces.

Vémonos pronto. Querémosvos

Humber, Óscar, Nostic y David».

Fuente: Músicasturiana