Misiva llanza’l so EP nuevu «Mala Relixón» y el videoclip «Mar Adientro»

Ta acabante d’asoleyar en toles plataformes dixitales Mala Relixón, l’EP nuevu de Misiva. Nesta séptima grabación d’estudiu, la banda moscona ruempe cola llínia d’escuridá y rabia de los sos primeros discos, pa presentar un soníu más averáu al del cenciellu “La Misiva“, publicáu’l pasáu marzu. Los cuatro cantares dan-y dan una vuelta de tuerca al estilu, a la temática y a la música que lleven faciendo dende va más de 12 años. Nesti EP la banda punk rock presenta «cuatro cañonazos enllenos d’enerxía, de riffs mui curiaos y de voces sorprendentes». En cuantes a les lletres, n’elles falen de «frayar colos patrones y los programes nos llanten dende neños y de volver al orixe, a la esencia de caún». «Ye un glayíu d’esperanza y un invitación a mirar pa dientro, que ye onde tán al final toles respuestes», comenta’l grupu. Mala Relixón grabóse nel OVNI Estudio, en Bonielles, baxo la dirección técnica de Pablo Martínez, encargáu de la producción, mezcla y masterización del discu. Amás vien acompañáu del videocip “Mar Adientro“, obra de Titi Muñoz, y con un diseñu fechu pol so artista de cabecera y tamién moscón, Rubén Fernández.

Misiva ye una de les bandes más renomaes de la escena punk-rock d’Asturies. La so trayectoria principió en Grau en 2010 y ta marcada por facer un punk-rock rápidu y melódicu, influyíu por nomes de la escena californiana como Bad Religion o Rancid. Anque los sos tres primeros discos tán en dos versiones -una toa n’asturianu y otra toa en castellanu-, dende’l cuartu trabayu yá namás asoleyó la versión n’asturianu, llingua na qu’interpreten tamién tol so repertoriu en directo y que sonó en festivales tan prestixosos como’l Resurrection Fest o’l Tsunami Xixón.